سؤال ياشمر..

[نور القصيم]

السلام عليكم

تحيه طيبه لكم أخواني أعضاء ومشرفين ديوانيه شمر....




أرجوا منكم الرد على سؤالي عن أخو ميثاء من قبيله شمر والذي أعرفه هو من الرمال ويقال ان له جولات أيام حكم الرشيد للجبل


هل هذا صحيح؟؟؟؟؟

[ولد عدي]

اهلا وسهلا بك اختي نور القصيم
مرحباً بك في ديوانية شمـــر
واتمنى لك التوفيق والنجاح
وطيـــب الاقامـــه بيـننـــا
في رحاب ديوانيتنا العزيزه
واتمنى ان نرى تفاعلك ومشاركاتك القيمه
في ديوانة شمـــــر
واتمنى من جميع الاخوان الكرام
ممن لهم معرفه في هذا الخصوص
التكرم بمساعدة الاخت الفاضله بالرد على تساؤلها
لكِ منى كل التقدير والاحترام والتــرحيب.
اخوكم ولد عـــــــــدي

[عبدالله الفاران]

هلا ومسهلا بــ(نور القصيم)


اللي اعرفه أن أخو ميثاء هو (أبن رخيص) من الزميل من شمر.

[الفداغي]

هلا بالاخت نور القصيم في دوانية شمر والسلام على الجميع
والنعم من اخو ميثا ابن رخيص ياعبد الله الفاران
اما بالنسبة لاخو ميثا من الرمال اللي سألت عنه الأخت نور القصيم فهو كما عرفت من الرمال انه علي ملفي المسلم وامدوني بقصيدتين له لايسع المجال لذكرها كاملتين وسأذكر مقتطفات من القصيدتين اللي كان وقتهن بعد حرب لشمر مع عتيبه وعقد علي الملفي على الملحا وهي من نياق شيوخ عتيبه ودرى الجناره بالملحا وارسل على علي الملفي وبعد مادرى علي الملفي بمرسال عبدالعزيز المتعب وانه يبي الملحا قال القصيدتين

القصيده الاوله يقول به






ياجمعت(ن) مع الجوانب لها اركان=تضايقت لوهو وسيع(ن)شعيبه
رقطى على كبد العدو شرها كان=ألين مهي بالعاده حريبه
كسبه مظاهير وخيل(ن) وقطعان=حتى البيوت اللي تبنى تجيبه
*
*
الي أن قال
*
*
يا امير ياعلك عزيز(ن) وطربان=ياما حلا زعج الغنى عقب غيبه
من فوق حمرا راسها العصر سكران=وليا اخلف الغزوان علم الرقيبه
حمرا بها هجر الفيافي ونبيان=والفخذ تقل ينهشه ناب شيبه
وليا بداله من ورا القاع نبيان=تودع مصاليب الاشده حطيبه
ياروحت مع سهلة(ن) والعلم بان=مثل الطموح اللي تحرى حبيبه
طالبك ملحا من حليات الالوان=عتيبية(ن) جتنا مع البل غصيبه
ملحا سنامه رادف(ن) قفو الامتان=من مرهفات النوق زين(ن) حليبه



القصيده الثانية يقول به



يا امير لاتفلس الكساب=اللي المصاليب تلحاها
طالبك طلبه ماني غصاب=عطية الشيخ ما احلاها
ابي ليا جيت انا الاقراب=أقول انا الشيخ خلاها




وبعد ذلك عاف الجنازه عبدالعزيز المتعب الملحا لعلي الملفي المسلم من الرمال من سنجاره
وسلامتكم ونأسف على الإطالة

[عبدالله الفاران]

مشكور اخوي الفداغي على الإيضاح وماقصرت وانا ذكرت اللي أعرفه حيث لم أنفي ولم أثبت وجود شخص باسم اخو ميثاء من الرمال ولكني قلت اللي اعرفه .... الخ . وكان قصدي ان من أشتهر بهذا العزوه هم الرخيص من شمر حسب ماني متأكد منه . ومرة اخرى الف شكر على التوضيح .

[الفداغي]

اخوي عبدالله ماحطينا شي باللي تعرفه واللي قلته انت صحيح وماعندنا اعتراض

[نور القصيم]

مشكورين على التجاوب منكم في هذا الموضوع الذي أردت ان اعرف الكثير عن اخو ميثاء ويعطيك العافيه يالفداغي على مجهودك

واتمنى من الفداغي ان تكتب لقصيده كامله اذا هي موجوده عندك

والاخ عبدالله الفاران اخو ميثاء نخوه ويمكن اكثر من فخيذه تنتخي فيها
ومشكور على مجهودك
تقبلوا تحيات نور القصيم

[الفداغي]

الأخت نور القصيم
شكرا على الرد
وبالنسبة لطلب القصيده ودي والله لو انزلها كامله للمنتدى بس يا أختي القصيده طويلة جدا وتاخذ وقت ياليت لو تعذريني بس اوعدك راح احاول اذا صارلي وقت فراغ

[بدوي المدينة]

أخو ميثاء وهو ملفي بن مريف بن رمال
وكان له شان كبير في معارك ابن رشيد ورثه ابنه علي على ((اخو ميثا))
وكان فارس مغوار وشارك علي بن ملفي مع الامير عبدالعزيز بن متعب الرشيد في حربه مع قبيله عـتــيبه وبعد أنتهاء المعركه وأنتصار قبيله شمر على عتيبه قامت قبيله شمر كي تتقاسم الغنائم وقد اختار أخو ميثاء ناقه ملحا وهي من أطيب الابل في تلك المعركه وبعد المعركه بأيام عرف الأمير متعب الرشيد (الجنازه)
أن الناقه التي أخذها اخو ميثائ هي تعود لأمير قبيله عتيبه فأرسل في طلب أخو ميثاء وأراد الأمير متعب ان يأخذ الناقه الملحا وهي ناقه طيبه وجمالها يفوق الوصف


وعند ما حضر أخو ميثاء الى الأمير متعب بن عبدالعزيز قال القصيده التاليه..




ياجمعتا مع الجوانب له أركان=تضايقت لو هو وسيع شعيبه

رقطى على كبد العدو شرها كان=ألين مهي بالسعاده حريبه

كسبه مظاهير وخيل وقطعان=حتى البيوت اللي تبني تجيبه


ينهظلهن ذروات عن المشي بقران=ليا روحن مع خايعا والجديبه

أوروكهن صمع تقل لون غدران=والسيف والدبره سهيرا صويبه

يقودهن شيخا ولى قصر برزان=يركض على نزل العدوا مايهيبه

تتليه قب ربعة بالحمى سمان=مع خيل شمر تسعة ألاف سبيبه

تتلي ولد متعب تقل خشم ضلعان=يهج عن وجه اللي دريبه

تتليه مثل الغيم مع روس نبيان=تودع على العدوان سرد وسحيبه

الخيل معهم بيرقا ضيم عربان=له غارتا على العدوا ينصخيبه

ثار العجاج ومن السرب تقل دخان=وكم طفلتا قدت مقاديم جيبه

نعمك من ماجد وسالم وسبهان=الكل منهم يلحق الخيل سيبه

ركبوا على السربه تقل ظرب عقبان=ومعهم شياهين يصبن الضريبه

وركب ولد متعب على الخيل ضرمان=من فوق قباب الملاقى عريبه

لحقت تنقز به تقل عنز غزلان=وعينه على جيب القلايع رغيبه

من فوق قب تنسف الخيل بركان=وليا أحتمت قامت تكسر عسيبه

كم واحدا من ظربته طاح سدران=ويرمى عليه من الرضم على نصيبه

يودع مداريع السرب تقل هتمان=ويطوع الروس الجلال الصليبه

ولى ديار غصب ماهو بالأثمان=خلى ضياع الزلم يدشر ذهيبه

ياأمير ياعلك عزيز وطربان=يا ما حلى زعج الغنى عقب غيبه

من فوق حمرا راسها العصر سكران=وليا أخلف الغزوان على الرقيبه

حمرا بها هجر الفيافي ونبيان=والفخذ تقل ينهشه ناب شيبه

وليا بداله من ورى القاع بنيان=تودع مصاليب الأشده حطيبه

ليا روحت مع سهلتا والعام بان=مثل الطموح اللي تحرى حبيبه

طالبك ملحا من حليات الألوان=عـتـيـبـيـتا جتنا مع الأبل غصيبه

ملحا سنامها رادفا قفوا الأمتان=من مرهفات النوق زين حليبه



وقد أعطى الأمير عبدالعزيز المتعب الرشيد أخو ميثاء الناقه الملحا بعد اقصيدة

[شقاويه]

معلومات قيمه ...

كل الشكر للاخت السائله والاخوان الذين تجاوبوا معها

لا عدمنااكم

تحياتي لكم
شقاويه

[نور القصيم]

الأخ بدوي المدينه مشكور والله يعطيك الف عافيه على الرد وعلى القصيده اللتي طلبتها وهي قيده أخو ميثاء وكل الشكر لجميع الاعضاء بالمنتدى
وتقبلوا فائق احترامي وتقديري لكم جميعا

نور القصيم